א' אל הקורינתים ו

ו א הֲיָעֹז אִישׁ מִכֶּם אֲשֶׁר-לוֹ רִיב עִם-רֵעֵהוּ לְהַקְרִיב אֶת-מִשְׁפָּטוֹ לִפְנֵי בְנֵי עַוְלָה וְלֹא לִפְנֵי אַנְשֵׁי קֹדֶשׁ׃ ב הֲלֹא יְדַעְתֶּם כִּי הַקְּדוֹשִׁים שֹׁפְטֵי תֵבֵל (דניאל ז' כב') וְאִם-אַתֶּם תִּשְׁפְּטוּ תֵּבֵל הַנְקַלֹּתֶם לִשְׁפֹּט דָּבָר קָטֹן׃ ג הֲלֹא יְדַעְתֶּם כִּי נִשְׁפֹּט גַּם אֶת-הַמַּלְאָכִים וְאַף כִּי-בִדְבָרִים הַנֹּגְעִים בְּמִחְיָתֵנוּ׃ ד וְאַתֶּם כַּאֲשֶׁר רִיב-לָכֶם בִּדְבַר מִחְיָה תּוֹשִׁיבוּ אֲנָשִׁים רֵיקִים בָּעֵדָה לְשֹׁפְטֵיכֶם׃ ה לְבָשְׁתְּכֶם אֲנִי מְדַבֵּר הֲכִי אֵין חָכָם בְּקִרְבְּכֶם הֲכִי אֵין גַּם-אֶחָד אֲשֶׁר יָדוֹ מַשֶּׂגֶת לִשְׁפֹּט בֵּין אִישׁ לְאָחִיו׃ ו וְהִנֵּה אָח נִשְׁפָּט אֶת-אָחִיו לִפְנֵי אֲנָשִׁים אֵין-אֱמוּנָה בָם׃ ז וְעַתָּה רַע הַדָּבָר מְאֹד כִּי תָרִיבוּ אִישׁ בַּעֲמִיתוֹ מַדּוּעַ לֹא-טוֹב לָכֶם הֱיוֹת עֲשׁוּקִים מַדּוּעַ לֹא-טוֹב הֱיוֹת רְצוּצִים׃ ח וְאַתֶּם תַּעַשְׁקוּ וּתְרֹצְצוּ אַף אֶת-אֲחֵיכֶם׃(ויקרא יט' יח') ט הַאִם לֹא יְדַעְתֶּם כִּי בְנֵי-עַוְלָה לֹא יִירְשׁוּ אֶת-מַלְכוּת הָאֱלֹהִים אַל-תַּתְעוּ אֶת-נַפְשְׁכֶם כָּל-בְּנֵי זְנוּנִים אוֹ עֹבְדֵי אֱלִילִים אוֹ-מְנָאֲפִי אוֹ-קְדֵשִׁים אוֹ-נֹתְנֵי שְׁכָבְתָּם בְּזָכָר׃ י אוֹ-גַנָּבִים אוֹ-בֹצְעֵי בֶצַע אוֹ סֹבְאֵי יַיִן אוֹ-מְגַדְּפִים אוֹ אַנְשֵׁי חָמָס כָּל-אֵלֶּה לֹא יִירְשׁוּ אֶת-מַלְכוּת הָאֱלֹהִים׃ יא וַאֲנָשִׁים כָּאֵלֶּה הָיוּ בָכֶם לְפָנִים אֲבָל רֻחַצְתֶּם נִקְדַּשְׁתֶּם וְנִצְדַּקְתֶּם בְּשֵׁם יֵשׁוּעַ הַמָשִׁיחַ אֲדֹנֵינוּ וּבְרוּחַ אֱלֹהֵינוּ׃ יב הַכֹּל נָכוֹן לְפָנַי אֲבָל לֹא הַכֹּל לְהוֹעִיל לִי הַכֹּל נָכוֹן לְפָנַי אֲבָל לֹא אֶהְיֶה עֶבֶד לְאֶחָד מֵהֶם׃ יג הָאֹכֶל לַבֶּטֶן וְהַבֶּטֶן לָאֹכֶל וְהָאֱלֹהִים יְאַבֵּד גַּם-אֶת-שְׁנֵיהֶם וְהַגּוּף אֵינֶנּוּ לִזְנוּת כִּי אִם-קֹדֶשׁ לָאָדוֹן וְהָאָדוֹן לַגּוּף׃ יד וְהָאֱלֹהִים הֵקִים אֶת-הָאָדוֹן וְגַם-אוֹתָנוּ יָקִים בִּגְבוּרָתוֹ׃ טו הֲלֹא יְדַעְתֶּם כִּי עַצְמֹתֵיכֶם אֵבָרֵי הַמָּשִׁיחַ הֵם הֲכִי אֶקַּח אֵבָרֵי הַמָּשִׁיחַ לַעֲשׂוֹתָם לְאֵבָרֵי זוֹנָה חָלִילָה׃ טז הֲכִי לֹא יְדַעְתֶּם כִּי הַנִּצְמָד לְזוֹנָה נִהְיָה עִמָּהּ לְבָשָׂר אֶחָד כְּמוֹ שֶׁנֶּאֱמַר וְהָיוּ שְׁנֵיהֶם לְבָשָׂר אֶחָד׃(בראשית ב' כד') יז וְהַנִּצְמָד לָאָדוֹן נִהְיָה עִמּוֹ לְרוּחַ אֶחָד׃(תהילים סג' ט') יח נוּסוּ אֵפוֹא מִן-הַזְּנוּת כָּל-חֵטְא אֲשֶׁר-יֶחֱטָא הָאָדָם הוּא מִחוּץ לִבְשָׂרוֹ וְאִישׁ זְנוּנִים אֶת-חֶטְאוֹ בִּבְשָׂרוֹ יִתְּנֶנּוּ׃ יט הֲכִי לֹא-יְדַעְתֶּם כִּי בְשַׂרְכֶם הוּא מִשְׁכַּן רוּחַ הַקֹּדֶשׁ בְּקִרְבְּכֶם אֲשֶׁר נָתַן לָכֶם אֱלֹהִים וְכִי לֹא-שֶׁלָּכֶם אַתֶּם׃ כ כִּי בִמְחִיר נִקְנֵיתֶם עַל-כֵּן כַּבְּדוּ אֶת-הָאֱלֹהִים בִּבְשַׂרְכֶם וּבְרוּחֲכֶם אֲשֶׁר לֵאלֹהִים הֵמָּה׃