א' אל הקורינתים י

י א וַאֲנִי לֹא אַחֲרִישׁ מֵהוֹדִיעֲכֶם אֶחָי כִּי אֲבוֹתֵינוּ הָיוּ כֻלָם תַּחַת הֶעָנָן (שמות יג' כא') וְכֻלָּם עָבְרוּ בְּתוֹךְ הַיָּם׃(שמות יד' כא'-כב') ב וְכֻלָּם נִטְבְּלוּ בֶעָנָן וּבַיָּם לִפְנֵי משֶׁה׃ ג וַיֹּאכְלוּ כֻלָּם מִן-לֶחֶם הַשָּׁמַיִם הַהוּא׃(דברים ח' ג') ד גַּם-שָׁתוּ כֻלָּם מִן-מַשְׁקֵה הַשָּׁמַיִם הַהוּא כִּי שָׁתוּ מִן-צוּר הַיְשׁוּעָה הַהֹלֵךְ אַחֲרֵיהֶם וְהַצּוּר הַזֶּה הוּא הַמָּשִׁיחַ׃(שמות יז' ו'; תהילים עח' טו') ה אֲבָל רֻבָּם לֹא רָצָה בָם אֱלֹהִים כִּי-נָפְלוּ פִגְרֵיהֶם בַּמִּדְבָּר׃(במדבר יד' כט') ו וְכָל-זֶה נִתַּן-לָנוּ לְמוֹפֵת לִבְלִי נִתְאֲוָה תַּאֲוָה רָעָה כַּאֲשֶׁר הִתְאַוּוּ הֵמָּה׃(במדבר יא' ד') ז וְאֶת-הַפְּסִילִים לֹא תַעַבְדוּ כַּאֲשֶׁר עָבְדוּ אֲנָשִׁים מִקְצוֹתָם כַּכָּתוּב וַיֵּשֶׁב הָעָם לֶאֱכֹל וְשָׁתוֹ וַיָּקֻמוּ לְצַחֵק׃(שמות לב' ו') ח וְזֹנִים לֹא נִהְיֶה כַּאֲשֶׁר זָנוּ אֲנָשִׁים מֵהֶם וַיִּפְּלוּ בְּיוֹם אֶחָד שְׁלשָׁה וְעֶשְׂרִים אָלֶף׃(במדבר כה' א'-ט') ט וְאֶת-הַמָּשִׁיחַ לֹא נְנַסֶּה כַּאֲשֶׁר אֲנָשִׁים מֵהֶם נִסּוּ אֶת-יְהוָֹה וַיְנַשְּׁכוּם הַנְּחָשִׁים׃(במדבר כא' ה'-ו') י וְלֹא תִלֹּנוּ כַּאֲשֶׁר הֵלִינוּ אֲנָשִׁים מֵהֶם וַיֹּאבְדוּ בְּיַד הַמַּשְׁחִית׃(במדבר יד' ב'; יד' לז') יא וְכָל-אֵלֶּה מָצְאוּ אֹתָם לִהְיוֹת לְמוֹפֵת וְגַם-נִכְתְבוּ לְמוּסָר לָנוּ אֲשֶׁר בָּאנוּ עַד-קִצֵּי עוֹלָמִים׃ יב עַל-כֵּן הַחשֵׁב כִּי הוּא עֹמֵד נָכוֹן יִזָּהֵר לְבִלְתִּי יִפֹּל׃ יג עוֹד לֹא-עָבְרָה מַסָּה עֲלֵכֶם זוּלָתִי כַּאֲשֶׁר תִּמָּצֵא לִבְנֵי אָדָם וְנֶאֱמָן הוּא הָאֱלֹהִים (דברים ז' ט'; ישעיהו מט' ז') אֲשֶׁר לֹא יִתֵּן לְנַסֹּתְכֶם יֶתֶר מִדֵּי כֹחֲכֶם וְגַם-בְּיוֹם מַסָּה יָכִין לָכֶם מִפְלָט כַּאֲשֶׁר תּוּכְלוּן שְׂאֵת׃(תהילים לד' כ') יד לָכֵן אֲהוּבֵי נַפְשִׁי נוּסוּ מֵעֲבֹדַת אֱלִילִים׃ טו הִנֵּה כְמוֹ אֶל-אֲנָשִׁים נְבוֹנִים אֲדַבְּרָה שִׁמְעוּ-נָא מִלָּתִי׃ טז כּוֹס הַבְּרָכָה אֲשֶׁר עָלֶיהָ אָנוּ מְבָרְכִים הֲלֹא הִיא הַמְחַבֶּרֶת אֹתָנוּ אֶל-דַּם הַמָּשִׁיחַ וְהַלֶּחֶם אֲשֶׁר אָנוּ פֹרְסִים הֲלֹא הוּא הַמְחַבֵּר אֹתָנוּ אֶל-בְּשַׂר הַמָּשִׁיחַ׃ יז כִּי אֲנַחְנוּ הָרַבִּים הָיִינוּ לְבָשָׂר אֶחָד כְּמוֹ לֶחֶם אֶחָד אַחֲרֵי אֲשֶׁר בְּלֶחֶם אֶחָד הָיִינוּ כֻלָּנוּ חֲבֵרִים׃ יח רְאוּ אֶת-בְּנֵי יִשְׂרָאֵל בַּעֲבֹדָתָם עֲבֹדַת בְּשָׂרִים הֲלֹא אֹכְלֵי הַזְּבָחִים חֲבֵרִים הֵם בַּמִּזְבֵּחַ׃(ויקרא ז' ו'; ויקרא ז' טו') יט וּמָה אֲנִי אֹמֵר הֲכִי-זֶבַח אֱלִילִים שֹׁרֶשׁ דָּבָר בּוֹ אוֹ כִּי-אֱלִיל יֶשׁ-בּוֹ שֹׁרֶשׁ דָּבָר׃ כ אֲבָל אֶת-אֲשֶׁר יִזְבְּחוּ הַגּוֹיִם לַשֵּׁדִים הֵם זֹבְחִים וְלֹא לֵאלֹהִים וְאֵין לִי חֵפֶץ כִּי-תִהְיוּ אַתֶּם חַבְרֵי הַשֵּׁדִים׃(דברים לב' יז') כא לֹא תוּכְלוּ לִשְׁתּוֹת מִכּוֹס הָאָדוֹן וּמִכּוֹס הַשֵּׁדִים לֹא תוּכְלוּ לְהִתְחַבֵּר לְשֻׁלְחָן הָאָדוֹן וּלְשֻׁלְחָן הַשֵּׁדִים׃ כב אוֹ הֲכִי-נָעִיר חֲמַת קִנְאַת הָאָדוֹן הַבְּרָב-כֹּחַ יִגְבַּר אִישׁ עָלָיו׃(דברים לב' כא') כג הַכֹּל נָכוֹן לִי אֲבָל לֹא הַכֹּל לְהוֹעִיל הַכֹּל נָכוֹן אֲבָל לֹא הַכֹּל לְהִבָּנוֹת מִמֶּנּוּ׃ כד אַל-יְבַקֵּשׁ אִישׁ טוֹבַת נַפְשׁוֹ לְבַדּוֹ כִּי אִם-גַּם-טוֹבַת רֵעֵהוּ׃ כה כָּל-הַנִּמְכָּר בַּשּׁוּק אֹתוֹ תֹאכֵלוּ וְאַל-תִּדְרְשׁוּ לְחִקְרֵי-לֵב׃ כו כִּי לַיהוָֹה הָאָרֶץ וּמְלוֹאָהּ׃(תהילים כד' א') כז וְאִם-יִקְרָא אֶתְכֶם אַחַד הָאֲנָשִׁים אֲשֶׁר אֵינָם מַאֲמִינִים וְתִרְצוּ לָלֶכֶת לְבֵיתוֹ אָכֹל תֹּאכְלוּ מִכָּל-אֲשֶׁר יוּשַׂם לִפְנֵיכֶם וְאַל-תִּדְרְשׁוּ לְחִקְרֵי-לֵב׃ כח וְכִי-יֹאמַר אֲלֵיכֶם אִישׁ זֶה הוּא זֶבַח לֹא תֹאכְלוּ מִמֶּנּוּ בַּעֲבוּר זֶה אֲשֶׁר הִגִּיד לָכֶם וּבַעֲבוּר חִקְרֵי-לֵב כִּי לַיהוָֹה הָאָרֶץ וּמְלוֹאָהּ׃ כט וַאֲנִי אֹמֵר חִקְרֵי-לֵב לֹא חִקְרֵי לִבְּךָ כִּי אִם-חִקְרֵי-לֵב הָאַחֵר כִּי לָמָּה-זֶּה תֵחָשֵׁב חֻפְשָׁתִי לַחֲטָאָה בְּמַחֲשֶׁבֶת לֵב אַחֵר׃ ל אִם-אָכַלְתִּי וּבֵרַכְתִּי לָמָּה-זֶּה יְחָרְפֵנִי עַל-אֲשֶׁר אֲנִי מְבָרֵךְ׃ לא עַל-כֵּן אִם תֹּאכְלוּ וְאִם-תִּשְׁתּוּ אוֹ תַעֲשׂוּ מְאוּמָה עֲשׂוּ כָל-מַעֲשֵׂיכֶם לִכְבוֹד אֱלֹהִים׃ לב אַל-תִּהְיוּ לְמִכְשׁוֹל לִפְנֵי הַיְּהוּדִים וְלֹא לִפְנֵי הַיְּוָנִים וְלֹא לִפְנֵי קְהַל אֱלֹהִים׃ לג כַּאֲשֶׁר גַּם-אָנֹכִי בְכָל-מַעֲשַׂי הִנְנִי לְהֵיטִיב לְכֻלָּם וְלֹא טוֹבַת נַפְשִׁי אֲנִי דֹרֵשׁ כִּי אִם-טוֹבַת רַבִּים לְמַעַן יוָּשֵׁעוּ׃