א' אל הקורינתים יו

טז א וְעַל-אֹדוֹת קְבֻצַת הַנְּדָבוֹת לַקְּדשִׁים כַּאֲשֶׁר צִוִּיתִי אֶת-הַקְּהִלּוֹת בְּגָלַטְיָא כֵּן תַּעֲשׂוּ גַּם-אַתֶּם׃ ב בְּאֶחָד בַּשַּׁבָּת כָּל-אִישׁ מִכֶּם כַּאֲשֶׁר תִּמְצָא יָדוֹ יָרִים אֶת-נִדְבָתוֹ לִהְיוֹת לְפִקָּדוֹן אִתּוֹ וְלֹא-תָרִימוּ אֶת-הַנְּדָבוֹת בְּבֹאִי׃ ג וְהָיָה כַּאֲשֶׁר אָבוֹא אֶשְׁלַח אֶת-הָאֲנָשִׁים הַטּוֹבִים בְּעֵינֵיכֶם עִם-אִגְּרוֹת לְהָבִיא אֶת-נִדְבַתְכֶם לִירוּשָׁלָיִם׃ ד וְאִם-יִכְשַׁר הַדָּבָר לָלֶכֶת גַּם-אָנֹכִי אָז יֵלְכוּ הֵם עִמָּדִי׃ ה וַאֲנִי אָבֹא אֲלֵיכֶם מִן-מַקְדּוֹנְיָא כִּי דֶרֶךְ מַקְדּוֹנְיָא אֶאֱבֹרָה׃ ו וְאוּלַי אָגוּר בְּתוֹכְכֶם אוֹ גַּם-אֶחֱרַף יְמֵי הַחֹרֶף עִמָּכֶם לְמַעַן תְּשַׁלְּחוּנִי אָז אֶל-אֲשֶׁר אֲנִי הוֹלֵךְ׃ ז כִּי אֵין רְצוֹנִי כַיּוֹם לִרְאֹתְכֶם כְּאֹרֵחַ נָטָה לָלוּן כִּי אִם-אֲקַוֶּה לָשֶׁבֶת עִמָּכֶם יָמִים מִסְפָּר אִם-יִרְצֶה יְהוָֹה׃ ח וּבְאֶפְסוֹס אֶתְמַהְמַהּ עַד-חַג הַשָּׁבֻעוֹת׃ ט כִּי-שָׁם נִפְתַּח לִי שַׁעַר גָּדוֹל הַמְּלָאכָה גְדוֹלָה וְהַמִּתְקוֹמְמִים רַבִּים׃ י וְכִי יָבוֹא טִמוֹתִיוֹס תְּנֻהוּ-נָא לָשֶׁבֶת בְּתוֹכְכֶם בִּבְלִי-פָחַד כִּי-מְלֶאכֶת יְהוָֹה הוּא עֹשֶׂה כָּמֹהוּ כָּמֹנִי׃ יא וְלָכֵן אַל-יִבְזֵהוּ אִישׁ אַךְ שַׁלְּחֻהוּ בְשָׁלוֹם וְאֵלַי יָבוֹא כִּי אֲחַכֶּה-לּוֹ עִם-הָאַחִים׃ יב וְעַל-אֹדוֹת אַפּוֹלוֹס אָחִינוּ הִנֵּה הִפְצַרְתִּי בוֹ מְאֹד לָבוֹא אֲלֵיכֶם עִם-הָאַחִים וְאֵין לוֹ כָּל-רָצוֹן לָבוֹא עַתָּה בֹּא יָבוֹא לְעֵת-מְצֹא׃ יג שִׁקְדוּ עִמְדוּ בְדֶרֶךְ אֱמוּנָה הִתְאשְׁשׁוּ וַעֲשׂוּ חָיִל׃ יד וְכָל-מַעֲשֵׂיכֶם עֲשׂוּ מֵאַהֲבָה׃ טו וַאֲנִי הִנְנִי דֹרֵשׁ מִכֶּם אֶחָי הֲלֹא יְדַעְתֶּם אֶת-בֵּית סְטְפָנוֹס כִּי-הֵם רֵאשִׁית פְּרִי אֲכַיָּא וְכִי הִקְדִּישׁוּ אֶת-נַפְשָׁם לְשָׁרֵת אֶת-הַקְּדוֹשִׁים׃ טז אֲשֶׁר עַל-כֵּן לַאֲנָשִׁים כָּאֵלֶּה תָּסוּרוּ לְמִשְׁמַעְתָּם גַּם-אַתֶּם וּלְכָל-פֹּעֵל וְעֹבֵד כְּמוֹהֶם׃ יז וַאֲנִי שָׂמַחְתִּי עַל בּוֹא סְטְפָנוֹס וּפָרְטוּנָטוֹס וַאֲכַיְקוֹס כִּי הֵמָּה מִלְאוּ אֶת-מַחְסֹרִי תַּחְתֵּיכֶם׃ יח וְכִי-הִנִּיחוּ אֶת-רוּחִי וְרוּחֲכֶם יַחְדָּו עַל-כֵּן דְּעוּ יְקַר עֵרֶךְ אֲנָשִׁים כָּאֵלֶּה׃ יט קְהִלּוֹת אַסְיָא שֹׁאֲלוֹת לָכֶם לְשָׁלוֹם עֲקִילַס וּפְרִיסְקָא וְגַם-הָעֵדָה אֲשֶׁר בְּבֵיתָם יֹאמְרוּ לָכֶם רֹב שָׁלוֹם בַּאֲדֹנֵינוּ׃ כ הָאַחִים כֻּלָּם שֹׁאֲלִים לָכֶם לְשָׁלוֹם שַׁאֲלוּ אִישׁ לְרֵעֵהוּ לְשָׁלוֹם בִּנְשִׁיקַת הַקֹּדֶשׁ׃ כא אֲנִי פּוֹלוֹס שֹׁאֵל לָכֶם לְשָׁלוֹם בִּכְתָב יָדִי׃ כב מִי אֲשֶׁר אֵינֶנּוּ אֹהֵב אֶת-הָאָדוֹן יֵשׁוּעַ הַמָּשִׁיחַ יָחֳרָם מָרַן אֲתָא׃ כג חֶסֶד יֵשׁוּעַ הַמָּשִׁיחַ אֲדֹנֵינוּ עֲלֵיכֶם׃ כד וְאַהֲבָתִי עִם-כֻּלְּכֶם בְּיֵשׁוּעַ הַמָּשִׁיחַ אָמֵן׃