על-פי מרקוס יו

טז א וְכִמְעַט עָבַר הַשַּׁבָּת וּמִרְיָם הַמַּגְדַּלִית וּמִרְיָם אֵם יַעֲקֹב וּשְׁלֹמִית קָנוּ סַמִּים לָבֹא וְלִמְשֹׁחַ אֹתוֹ׃ ב וּבָאֶחָד בַּשַּׁבָּת בַּבֹּקֶר הַשְׁכֵּם בָּאוּ אֶל-הַקָּבֶר עִם-עֲלוֹת הַשָּׁמֶשׁ׃ ג וַתֹּאמַרְנָה אִשָּׁה אֶל-אֲחוֹתָהּ מִי יָגֶל-לָנוּ אֶת-הָאֶבֶן מֵעַל פִּי-הַקָּבֶר׃ ד וַתִּשָּׂאנָה אֶת-עֵינֵיהֶן וַתִּרְאֶינָה כִּי הָאֶבֶן נָגֹלָּה כִּי גְדוֹלָה הָיְתָה מְאֹד׃ ה וַתָּבֹאנָה אֶל-תּוֹךְ הַקָּבֶר וַתִּרְאֶינָה נַעַר אֶחָד עֹטֶה מְעִיל לָבָן יֹשֵׁב מֵעֵבֶר הַיָּמִין וַתִּבָּהַלְנָה׃ ו וַיֹּאמֶר אֲלֵיהֶן אַל-תִּבָּהַלְנָה הִנֵּה אַתֶּן מְבַקְשׁוֹת אֶת-יֵשׁוּעַ הַנָּצְרִי אֲשֶׁר נִצְלָב הֲלֹא הוּא קָם וְאֵינֶנּוּ פֹה רְאֶינָה אֶת-הַמָּקוֹם אֲשֶׁר שָׂמוּהוּ שָׁמָּה׃ ז אַךְ-לֵכְנָה וְהַגֵּדְנָה לְתַלְמִידָיו וּלְפֶטְרוֹס כִּי הוּא הוֹלֵךְ לִפְנֵיכֶם הַגָּלִילָה וְשָׁם תִּרְאוּ אֹתוֹ כַּאֲשֶׁר דִּבֶּר לָכֶם׃ ח וַתְּמַהֵרְנָה לָצֵאת מִן-הַקֶּבֶר וַתָּנוֹסְנָה כִּי חִיל וָפַחַד אֲחָזוּן וְלֹא-הִגִּידוּ לְאִישׁ דָּבָר כִּי יָרְאוּ מְאֹד׃ ט וַיְהִי בָּאֶחָד בַּשַּׁבָּת בַּבֹּקֶר אַחֲרֵי תְקוּמָתוֹ וַיֵּרָא אֶל-מִרְיָם הַמַּגְּדָּלִית רִאשׁוֹנָה הִיא הָאִשָּׁה אֲשֶׁר הֶעֱבִיר מִמֶּנָּה שֶׁבַע רוּחוֹת רָעוֹת׃ י וְהִיא הָלְכָה וַתַּגֵּד לְאַנְשֵׁי בְרִיתוֹ אֲשֶׁר הָיוּ עִמּוֹ וְהֵם מִתְאַבְּלִים וּבֹכִים׃ יא וְאַחֲרֵי אֲשֶׁר שָׁמְעוּ כִּי הוּא חָי וְכִי נִרְאָה אֵלֶיהָ לֹא הֶאֱמִינוּ לָהּ׃ יב וְאַחֲרֵי-כֵן נִרְאָה בִּדְמוּת אַחֶרֶת אֶל-שְׁנַיִם מֵהֶם עַל-פְּנֵי הַשָּׂדֶה כַּאֲשֶׁר הָלְכוּ לְדַרְכָּם׃ יג וַיָּשׁוּבוּ וַיַּגִּידוּ לַאֲחֵרִים וְלֹא הֶאֱמִינוּ גַּם-בְּדִבְרֵיהֶם׃ יד וַיֵּרָא אַחֲרֵי-כֵן אֶל-אַחַד הֶעָשָׂר בְּשִׁבְתָּם עַל-הַשֻּׁלְחָן וַיּוֹכִיחֵם עַל-חֹסֶר אֱמוּנָתָם וְעַל-קְשִׁי לִבָּם כִּי לֹא-הֶאֱמִינוּ לְאֵלֶּה אֲשֶׁר רָאוּ אֹתוֹ אַחֲרֵי תְקוּמָתוֹ׃ טו וַיֹּאמֶר אֲלֵיהֶם לְכוּ בְכָל-הָאָרֶץ וְקִרְאוּ אֶת-הַבְּשׂוֹרָה לְכָל-בָּשָׂר׃ טז מִי אֲשֶׁר יַאֲמִין וְיִטָּבֵל יִוָּשֵׁעַ וּמִי אֲשֶׁר לֹא-יַאֲמִין יֶאְשָׁם׃ יז וְאֵלֶּה הָאֹתוֹת אֲשֶׁר יֵעָשׂוּ בִידֵי הַמַּאֲמִינִים רוּחוֹת רָעוֹת יַעֲבִירוּ בִשְׁמִי וּבִלְשֹׁנוֹת חֲדָשׁוֹת יְדַבֵּרוּן׃ יח נְחָשִׁים כִּי-יִשְׂאוּ אוֹ כִי-יִשְׁתּוּ סַמִּים אֲשֶׁר מָוֶת בָּם לֹא יָרֵעוּ וְלֹא יַשְׁחִיתוּ לָהֶם וִידֵיהֶם יָשִׂימוּ עַל-חוֹלִים וְחָיוּ מֵחָלְיָם׃ יט וַיְהִי כַּאֲשֶׁר כִּלָּה הָאָדוֹן יֵשׁוּעַ לְדַבֵּר אֲלֵיהֶם וַיַּעַל הַשָּׁמַיְמָה (מלכים ב', ב' יא') וַיֵּשֶׁב לִימִין הָאֱלֹהִים׃(תהילים קי' א') כ וְהֵם יָצְאוּ וַיְבַשְּׂרוּ אֶת-הַבְּשׂוֹרָה בְּכָל-מָקוֹם וְיַד-הָאָדוֹן הָיְתָה עִמָּם בִּמְלַאכְתָּם וַיָּקֶם אֶת-דְּבָרוֹ בְּאֹתוֹת אֲשֶׁר נַעֲשׂוּ בִּידֵיהֶם אָמֵן׃