על-פי מתי כא

כא א וַיְהִי כַּאֲשֶׁר בָּאוּ מִקָּרוֹב לִירוּשָׁלַיִם אֶל-בֵּית-פַּגַּי אֶל-הַר הַזֵּיתִים וַיִּשְׁלַח יֵשׁוּעַ שְׁנַיִם מִתַּלְמִידָיו׃ ב וַיֹּאמֶר אֲלֵיהֶם לְכוּ אֶל-הַכְּפָר אֲשֶׁר מִנֶּגֶד וּמְצָאתֶם שָׁם אָתוֹן אֲסוּרָה וְעַיִר אֶצְלָהּ הַתִּירוּם וַהֲבִיאוּם אֵלָי׃ ג וְכִי-יֹאמַר אִישׁ אֲלֵיכֶם דָּבָר וַאֲמַרְתֶּם הָאָדוֹן יֶשׁ-לוֹ חֵפֶץ בָּם וְעַד מְהֵרָה יְשַׁלְּחֵם׃ ד וְכָל-זֹאת הָיָה לְמַלֹּאת אֵת אֲשֶׁר נֶאֱמַר בְּיַד-הַנָּבִיא לֵאמֹר׃ ה אִמְרוּ לְבַת-צִיּוֹן הִנֵּה מַלְכֵּךְ יָבוֹא לָךְ עָנִי וְרֹכֵב עַל-חֲמוֹר וְעַל-עַיִר בֶּן-אֲתֹנוֹת׃(זכריה ט' ט') ו וַיֵּלְכוּ הַתַּלְמִידִים וַיַּעֲשׂוּ כַּאֲשֶׁר צִוָּה אֹתָם יֵשׁוּעַ׃ ז וַיָּבִיאוּ אֶת-הָאָתוֹן וְאֶת-הָעַיִר וַיָּשִׂימוּ עַל-גַּבָּם אֶת-בִּגְדֵיהֶם וְהוּא יָשַׁב עֲלֵיהֶם׃ ח וְרַבִּים מִן-הָעָם פָּרְשׂוּ אֶת-בִּגְדֵיהֶם עַל-פְּנֵי הַדָּרֶךְ וְיֵשׁ מֵהֶם אֲשֶׁר כָּרְתוּ זְמֹרוֹת מִן-הָעֵצִים וַיִּשְׁטְחוּ אֹתָן שָׁמָּה׃(מלכים ב', ט' יג') ט וַהֲמוֹן הָעָם הַהֹלֵךְ מִלְּפָנָיו וּמֵאַחֲרָיו עָנוּ לֵאמֹר הוֹשַׁע-נָא לְבֶן-דָּוִד בָּרוּךְ הַבָּא בְּשֵׁם יְהוָֹה הוֹשַׁע-נָא בִּשְׁמֵי מָרוֹם׃(תהילים קיח' כה'-כו') י וּבְבֹאוֹ יְרוּשָׁלָיִם וַתֵּהוֹם כָּל-הָעִיר לֵאמֹר מִי הוּא זֶה׃(תהילים כד' ז'-י'; ירמיהו ל' יח'-כב') יא וַיֹּאמְרוּ הֲמוֹן הָעָם זֶה הוּא הַנָּבִיא יֵשׁוּעַ מִנְּצֶרֶת אֲשֶׁר בַּגָּלִיל׃ יב וַיָּבוֹא יֵשׁוּעַ אֶל-מִקְדַּשׁ הָאֱלֹהִים וַיְגָרֶשׁ מִשָּׁם כָּל-הַמּוֹכְרִים וְהַקּוֹנִים בַּמִּקְדָּשׁ וַיַּהֲפֹךְ אֶת-שֻׁלְחֲנוֹת מַחֲלִפֵי הַכֶּסֶף וְאֶת-מוֹשְׁבוֹת מֹכְרֵי הַיּוֹנִים׃(דברים יד' כד'-כו') יג וַיֹּאמֶר אֲלֵיהֶם הֵן כָּתוּב כִּי בֵיתִי בֵּית-תְּפִלָּה יִקָּרֵא (ישעיהו נו' ז') וְאַתֶּם עֲשִׂיתֶם אֹתוֹ לִמְעָרַת פָּרִיצִים׃(ירמיהו ז' יא') יד וַיִּגְּשׁוּ אֵלָיו עִוְרִים וּפִסְחִים בְּבֵית הַמִּקְדָּשׁ וַיִּרְפָּאֵם׃ טו וַיִּרְאוּ רָאשֵׁי הַכֹּהֲנִים וְהַסּוֹפְרִים אֵת הַנִּפְלָאוֹת אֲשֶׁר עָשָׂה וְאֵת הַיְלָדִים קֹרְאִים וְעֹנִים בַּמִּקְדָּשׁ הוֹשַׁע-נָא לְבֶן-דָּוִד (תהילים קיח' כה') וַיִּחַר לָהֶם׃ טז וַיֹּאמְרוּ אֵלָיו הֲכִי שָׁמַעְתָּ מָה אֵלֶּה אֹמְרִים וַיֹּאמֶר אֲלֵיהֶם יֵשׁוּעַ הֵן הֲלֹא קְרָאתֶם מִפִּי עוֹלְלִים וְיוֹנְקִים יִסַּדְתָּ עֹז׃(תהילים ח' ג') יז וַיַּעַזְבֵם וַיֵּצֵא אֶל-מִחוּץ לָעִיר אֶל-בֵּית-עַנְיָה וַיָּלֶן שָׁם׃ יח וַיָּשָׁב הָעִירָה בַּבֹּקֶר וְהוּא רָעֵב׃ יט וַיַּרְא תְּאֵנָה אַחַת בַּדָּרֶךְ וַיִּקְרַב אֵלֶיהָ וְלֹא-מְצָא בָהּ מְאוּמָה זוּלָתִי עָלִים לְבַדָּם וַיֹּאמֶר לָהּ לֹא-תַעֲשִׂי עוֹד פְּרִי מֵעַתָּה וְעַד-עוֹלָם וַתִּיבַשׁ הַתְּאֵנָה פִּתְאֹם׃ כ וְהַתַּלְמִידִים רָאוּ וַיִּתְמְהוּ לֵאמֹר אֵיךְ יָבְשָׁה הַתְּאֵנָה פִּתְאֹם׃ כא וַיַּעַן יֵשׁוּעַ וַיֹּאמֶר אֲלֵיהֶם אָמֵן אֲנִי אֹמֵר לָכֶם אִם-יֵשׁ בָּכֶם אֱמוּנָה וְאֵינְכֶם פֹּסְחִים עַל-שְׁתֵּי הַסְּעִפִּים לֹא לְבַד כַּמַּעֲשֶׂה הַזֶּה אֲשֶׁר נַעֲשָׂה לַתְּאֵנָה תַּעֲשׂוּ כִּי אִם-גַּם תֹּאמְרוּ לָהָר הַזֶּה הִנָּשֵׂא וְהִתְנַפֵּל אֶל-תּוֹךְ הַיָּם וִיהִי כֵן׃ כב וְכָל-דָּבָר אֲשֶׁר תִּשְׁאֲלוּ בִתְפִלָּה אִם רַק בֶּאֱמוּנָה שְׁאֶלְתֶּם יֻתַּן לָכֶם׃ כג וַיָּבֹא אֶל-הַמִּקְדָּשׁ וַיִּגְּשׁוּ אֵלָיו רָאשֵׁי הַכֹּהֲנִים וְזִקְנֵי הָעָם בְּעוֹדוֹ מְלַמֵּד לָעָם וַיֹּאמְרוּ בְּאֵיזֶה רִשְׁיוֹן אַתָּה עֹשֶׂה אֵלֶּה וּמִי-נָתַן לְךָ הָרִשְׁיוֹן הַזֶּה׃ כד וַיַּעַן יֵשׁוּעַ וַיֹּאמֶר אֲלֵיהֶם אֶשְׁאַל מִכֶּם גַּם-אָנֹכִי שְׁאַלָה אַחַת וְאִם-תַּגִּידוּ לִי גַּם-אָנֹכִי אַגִּיד לָכֶם בְּאֵיזֶה רִשְׁיוֹן אֲנִי עֹשֶׂה אֵלֶּה׃ כה טְבִילַת יוֹחָנָן מִפִּי-מִי הָיְתָה מִצְוָתָהּ מִן-הַשָּׁמַיִם אוֹ מִבְּנֵי-אָדָם וַיְהִי הֵם שֹׁקְלִים בְּדַעְתָּם לֵאמֹר אִם נֹאמַר מִן-הַשָּׁמַיִם יֹאמַר לָנוּ וּמַדּוּעַ לֹא הֶאֱמַנְתֶּם לוֹ׃ כו וְאִם נֹאמַר מִבְּנֵי אָדָם יְרֵאִים אֲנַחְנוּ אֶת-הֲמוֹן הָעָם כִּי-כֻלָּם חִשְּׁבוּ אֶת-יוֹחָנָן לְנָבִיא׃ כז וַיַּעֲנוּ אֶת-יֵשׁוּעַ וַיֹּאמְרוּ לֹא יָדָעְנוּ וַיֹּאמֶר אֲלֵיהֶם גַּם-אֲנִי לֹא אַגִּיד לָכֶם בְּאֵיזֶה רִשְׁיוֹן אֲנִי עֹשֶׂה אֵלֶּה׃ כח אֲבָל מַה-יַּחֲשֹׁב לִבְּכֶם אִישׁ הָיָה וְלוֹ שְׁנֵי בָנִים וַיָּבֹא אֶל-הָאֶחָד וַיֹּאמֶר לְכָה-בְּנִי וַעֲבֹד הַיּוֹם אֶת-כַּרְמִי׃ כט וַיַּעַן וַיֹּאמֶר לֹא חָפָצְתִּי וְאַחֲרֵי-כֵן נֶהְפַּךְ עָלָיו לִבּוֹ וַיֵּלַךְ׃ ל וַיָּבֹא אֶל-הַשֵּׁנִי וַיְדַבֵּר כַּדָּבָר הַזֶּה וַיַּעַן וַיֹּאמֶר הִנְנִי אֲדֹנִי וְלֹא הָלָךְ׃ לא מִי מִשְּׁנֵיהֶם מִלֵּא אַחַר רְצוֹן אָבִיו וַיֹּאמְרוּ הָרִאשׁוֹן וַיֹּאמֶר עֲלֵיהֶם יֵשׁוּעַ אָמֵן אֲנִי אֹמֵר לָכֶם כִּי הַמּוֹכְסִים וְהַזֹּנוֹת יַקְדִּימוּ לָבֹא לְמַלְכוּת הָאֱלֹהִים מִכֶּם׃ לב כִּי יוֹחָנָן בָּא אֲלֵיכֶם בָּדֶרֶךְ צְדָקָה וְלֹא הֶאֱמַנְתֶּם לוֹ וְהַמּוֹכְסִים וְהַזֹּנוֹת הֶאֱמִינוּ לוֹ וְאַתֶּם רְאִיתֶם כָּל-זֹאת וְלֹא הֲשִׁיבֹתֶם אֶל-לִבְּכֶם לְהַאֲמִין לוֹ׃ לג שִׁמְעוּ מָשָׁל אַחֵר אִישׁ הָיָה בַּעַל-בַּיִת אֲשֶׁר נָטַע כֶּרֶם וַיְעַזְּקֵהוּ מִסָּבִיב וְיֶקֶב חָצֵב בּוֹ וַיִּבֶן מִגְדָּל בְּתוֹכוֹ וְנָתַן אֹתוֹ לַנֹּטְרִים וְהָלַךְ מִחוּץ לָאָרֶץ׃ לד כְּבֹא עֵת הַבָּצִיר שָׁלַח אֶת-עֲבָדָיו אֶל-הַנֹּטְרִים לְהָבִיא אֶת-פִּרְיוֹ׃ לה וַיִּתְפְּשׂוּ הַנֹּטְרִים בַּעֲבָדָיו וַיַּכּוּ אֶת-אֶחָד מֵהֶם וְאֶת-אַחֵר הָרְגוּ וְאֶת-אַחֵר סִקֵּלוּ׃(נחמיה ט' כו') לו וַיּוֹסֶף וַיִּשְׁלַח עֲבָדִים אֲחֵרִים רַבִּים מִן-הָרִאשֹׁנִים וְגַם-לָהֶם עָשׂוּ כֵן׃ לז וְאַחֲרֵי-כֵן שָׁלַח אֲלֵיהֶם אֶת-בְּנוֹ כִּי אָמַר אֶת-בְּנִי יִירָאוּ׃ לח וְהַנֹּטְרִים כִּרְאוֹתָם אֶת-הַבֵּן וַיֹּאמְרוּ אִישׁ אֶל-אָחִיו הִנֵּה הַיּוֹרֵשׁ לְכוּ וְנַהַרְגֵהוּ וְנִירַשׁ לָנוּ אֶת-יְרֻשָּׁתוֹ׃ לט וַיִּתְפְּשׂוּ בּוֹ וַיַּשְׁלִיכֻהוּ אֶל-מִחוּץ לַכֶּרֶם וַיַּהַרְגֻהוּ׃ מ וְעַתָּה כְּבֹא בַּעַל הַכָּרֶם מַה-יַּעֲשֶׂה לַנֹּטְרִים הָהֵם׃ מא וַיֹּאמְרוּ אֵלָיו הַשְׁמֵד יַשְׁמִיד אֶת-בְּנֵי הַבְּלִיַּעַל הָאֵלֶּה וְנָתַן כַּרְמוֹ לְנֹטְרִים אֲחֵרִים אֲשֶׁר יִתְּנוּ לוֹ אֶת-פִּרְיוֹ בְּעִתּוֹ׃(תהילים קיח' כב'-כג') מב וַיֹּאמֶר אֲלֵיהֶם יֵשׁוּעַ הֲלֹא קְרָאתֶם בַּכְּתוּבִים אֶבֶן מָאֲסוּ הַבּוֹנִים הָיְתָה לְרֹאשׁ פִּנָּה מֵאֵת יְהוָֹה הָיְתָה זֹּאת הִיא נִפְלָאת בְּעֵינֵינוּ׃ מג עַל-כֵּן אֲנִי אֹמֵר לָכֶם כִּי תוּסַר מַלְכוּת הָאֱלֹהִים מִכֶּם וְתִנָּתֵן לְגוֹי אֲשֶׁר יִתֵּן אֶת-פִּרְיָהּ׃ מד וְהַנֹּפֵל עַל-הָאֶבֶן הַזֹּאת יִתְפּוֹרָר (ישעיהו ח' יד'-טו') וְכָל-מִי אֲשֶׁר תִּפֹּל עָלָיו תְּדַכְּאֶנּוּ לֶעָפָר׃(דניאל ב' מב') מה וְרָאשֵׁי הַכֹּהֲנִים וְהַפְּרוּשִׁים בְּשָׁמְעָם אֶת-מְשָׁלָיו יָדְעוּ כִּי עֲלֵיהֶם דִּבֵּר׃ מו וַיְבַקְשׁוּ לְתָפְשׂוֹ אַךְ יָרְאוּ מִפְּנֵי הֲמוֹן הָעָם כִּי חִשְּׁבוּ אֹתוֹ לְנָבִיא׃