אל הפיליפים ב

ב א לָכֵן אִם-יֵשׁ נֹחַם מָה בַּמָּשִׁיחַ אִם-יֵשׁ אַהֲבָה מְשִׁיבַת נָפֶשׁ אִם-יֵשׁ חִבּוּר הָרוּחַ אִם-יֵשׁ רַחֲמִים וַחֲסָדִים׃ ב הַשְׁלִימוּ-נָא שְׂשׂוֹן לְבָבִי וְהִתְאַחֲדוּ בְדֵעָה אַחַת אַהֲבָה אַחַת נֶפֶשׁ אַחַת וְלֵב אֶחָד׃ ג אַל-תַּעֲשׂוּ דָבָר בִּמְרִיבָה אוֹ בִּכְבוֹד שָׁוְא כִּי אִם-בְּעַנְוַתְכֶם תַּחְשְׁבוּ אִישׁ אֶת-אָחִיו לְגָדוֹל מִמֶּנּוּ׃ ד אַל-יָחוּשׁ אִישׁ לְטוֹבַת נַפְשׁוֹ לְבַדּוֹ כִּי אִם-גַּם לְטוֹבַת רֵעֵהוּ׃ ה וִיהִי כֵן לִבְּכֶם כִּלְבַב יֵשׁוּעַ הַמָּשִׁיחַ׃ ו הוּא אֲשֶׁר בְּמוֹצָאֹתָיו נִמְצָא בִדְמוּת אֱלֹהִים וּבְכָל-זֹאת לֹא חָשַׁב הֱיוֹתוֹ שָׁוֶה לֵאלֹהִים כְּשָׁלָל לוֹ׃ ז כִּי אִם-הִתְנַצֵּל אֶת-כְּבוֹדוֹ וַיִּלְבַּשׁ דְּמוּת עָבֶד (ישעיהו נג' ג') וַיְהִי כְּתַבְנִית אַחַד הָאָדָם׃(ישעיהו מב' א') ח וְאַחֲרֵי אֲשֶׁר נִמְצָא כְאָדָם לַתֹּאַר הִשְׁפִּיל נַפְשׁוֹ וַיִּכָּנַע עַד-מָוֶת עַד-מוּת עַל-הָעֵץ׃(תהילים מ' ט') ט עַל-כֵּן גַּם-הָאֱלֹהִים הֵרִימוֹ עָל וַיִּתֶּן-לוֹ שֵׁם נַעֲלֶה מִכָּל-שֵׁם׃ י כִּי לְשֵׁם יֵשׁוּעַ תִּכְרַע כָּל-בֶּרֶךְ אֲשֶׁר בַּשָּׁמַיִם וַאֲשֶׁר בָּאָרֶץ וַאֲשֶׁר מִתַּחַת לָאָרֶץ׃(תהילים כב' ל'; ישעיהו מה' כג') יא וְכָל-לָשׁוֹן תִּשָּׁבַע כִּי יֵשׁוּעַ הַמָּשִׁיחַ הוּא הָאָדוֹן לִכְבוֹד אֱלֹהִים הָאָב׃ יב עַל-כֵּן אֲהוּבֵי נַפְשִׁי כַּאֲשֶׁר שְׁמַעְתֶּם אֵלַי תָּמִיד בִּהְיוֹתִי לִפְנֵיכֶם וְגַם-עוֹד יֶתֶר הַרְבֵּה כַּיּוֹם בִּהְיוֹתִי מֵרָחוֹק עִבְדוּ בְיִרְאָה וּבִרְעָדָה לְיֵשַׁע נַפְשְׁכֶם׃(תהילים ב' יא') יג כִּי אֱלֹהִים הוּא הַנֹּתֵן לָכֶם כֹּחַ לַחְפֹּץ וְגַם-לַעֲשׂוֹת כְּחֶפְצוֹ׃ יד וְכֹל אֲשֶׁר תַּעֲשׂוּ עֲשׂוּ בִּבְלִי תְלוּנָּה וּבִבְלִי מָדוֹן׃ טו לְבַעֲבוּר תִּהְיוּ זַכִּים וּתְמִימִים כִּבְנֵי אֱלֹהִים בִּבְלִי-מוּם בְּתוֹךְ דּוֹר עִקֵּשׁ ופְתַלְתֹּל אֲשֶׁר-תָּאִירוּ בֵינֵיהֶם כִּמְאֹרֹת עֲלֵי-הָאָרֶץ׃(דניאל יב' ג') טז כִּי תֹאחֲזוּן בִּדְבַר הַחַיִּים לִהְיוֹת לִי לְתִפְאֶרֶת בְּיוֹם הַמָּשִׁיחַ כִּי לֹא חַשְׁתִּי לָרִיק וְלֹא יָגַעְתִּי לַתֹּהוּ׃(ישעיהו סה' כג') יז וְגַם לוּ יִשָּׁפֵךְ דָּמִי עֲלֵי-זֶבַח וַעֲבֹדָה לֶאֱמוּנַתְכֶם (במדבר טו' ה'-י') אָשִׂישׂ עַל-כֻּלְּכֶם וְאָגִילָה׃ יח וְכֵן שִׂישׂוּ גַם-אַתֶּם וְגִילוּ עִמָּדִי׃ יט וַאֲנִי תוֹחַלְתִּי בְיֵשׁוּעַ אֲדֹנֵינוּ לִשְׁלֹחַ לָכֶם מְהֵרָה אֶת-טִימוֹתִיּוֹס לְהָשִׁיב נַפְשִׁי גַּם-אֲנִי כַּאֲשֶׁר אֵדַע מָה עִמָּכֶם׃ כ כִּי זוּלָתוֹ אֵין-אִתִּי אִישׁ כִּלְבָבִי הַדֹּאֵג לָכֶם מִמּקוֹר נַפְשׁוֹ׃ כא כִּי כֻלָּם חֶפְצֵי נַפְשָׁם יִדְרֹשׁוּן וְלֹא חֶפְצֵי יֵשׁוּעַ הַמָשִׁיחַ׃ כב וְרַק אֹתוֹ יְדַעְתֶּם כִּי צָרוּף הוּא בַּעֲלִיל וּכְבֵן לִפְנֵי אָבִיו עָבַד עִמִּי בְּמַלְאֲכוּת הַבְּשׂרָה׃ כג אַקֲוֶּה כִּי אֶשְׁלָחֶנּוּ לָכֶם בְּקֶרֶב הַיָמִים אַחֲרֵי אֲשֶׁר אֶרְאֶה מַה-יֵּעָשֶׂה בִּי׃ כד אַךְ בַּאֲדֹנֵינוּ בָטַחְתִּי כִּי גַם-אָנֹכִי אָבוֹא אֲלֵיכֶם מְהֵרָה׃ כה וְרָאִיתִי כִּי נָכוֹן הַדָּבָר לִשְׁלֹחַ לָכֶם אֶת-אֶפַּפְרוֹדִיטוֹס אָחִי סוֹמֵךְ יָדִי בַּעֲבֹדָתִי וְגֶבֶר עֲמִיתִי בְּמִלְחַמְתִּי הֲלֹא הוּא הַשָּׁלוּחַ מִכֶּם וְהַנֹּתֵן לִי מַחְסֹרָי׃ כו כִּי נִכְסְפָה נַפְשׁוֹ לְכֻלְּכֶם וְיִתְעַצֵּב אֶל-לִבּוֹ בַּעֲבוּר אֲשֶׁר שְׁמַעְתֶּם כִּי חָלָה׃ כז כִּי אָמֵן חָלֹה חָלָה וְנָטָה לָמוּת אַךְ הָאֱלֹהִים הִטָּה אֵלָיו חָסֶד וְלֹא אֵלָיו לְבַדּוֹ כִּי אִם-גַּם אֵלַי לְבִלְתִּי הוֹסִיף לִי יָגוֹן עַל-יָגוֹן׃ כח עַל-כֵּן חַשְׁתִּי לְשָׁלְחוֹ לְמַעַן תִּרְאֻהוּ וְתָשִׂישׂוּ בוֹ וְנִגְרַע יָגוֹן מִמֶּנִּי׃ כט אֲשֶׁר לָזֹאת קַדְּמוּ פָנָיו בַּאֲדֹנֵינוּ בְּשָׂשׂוֹן רָב וְהָבוּ כָבוֹד לַאֲנָשִׁים כָּמֹהוּ׃ ל כִּי הִגִּיעָ עַד-שַׁעֲרֵי מָוֶת בַּעֲבוּר עֲבֹדַת הַמָּשִׁיחַ וַיַּשְׁלֵךְ נַפְשׁוֹ מִנֶּגֶד לְמַעַן הִמָּנוֹת הַחֶסְרוֹן אֲשֶׁר קָצְרָה יֶדְכֶם לְסָמְכֵנִי׃