אל הרומים יד

יד א אִישׁ רְפֵה יָדַיִם בֶּאֱמוּנָה קַבְּלֻהוּ בְתוֹכְכֶם וְלֹא לְחִקְרֵי לֵב לִשְׂעִיפָּיו וְעֶשְׁתֹּנֹתָיו׃ ב יֵשׁ מַאֲמִין כִּי כָּל-דָּבָר נָכוֹן לוֹ לֶאֱכֹל וּרְפֵה יָדַיִם זֶה יֹאכַל יָרֶק׃ ג הָאֹכֵל כָּל-מַאֲכָל אַל-יָבוּז לַאֲשֶׁר אֵינֶנּוּ אֹכֵל וַאֲשֶׁר אֵינֶנּוּ אֹכֵל אַל-יִשְׁפֹּט אֶת-הָאֹכֵל כִּי-נָשָׂא פָנָיו אֱלֹהִים׃ ד מִי אַתָּה כִּי-תִשְׁפֹּט עֶבֶד לֹא-לָךְ הֵן לַאדֹנָיו הוּא כִּי יָקוּם וְכִי-יִפֹּל וְהוּא יָקוּם כִּי-רַב כֹּחַ יְהוָֹה לַהֲקִימוֹ׃ ה יֵשׁ מַבְדִּיל יוֹם מֵעַל יוֹם וְיֵשׁ אֲשֶׁר יוֹם כַּיּוֹם נֶחְשָׁב-לוֹ יְהִי-נָא כָּל-אִישׁ סָמוּךְ לִבּוֹ בְּדַעְתּוֹ׃ ו הַמְכַבֵּד יָמִים לַיהוָֹה הוּא מְכַבְדָם וַאֲשֶׁר אֵינֶנוּ מְכַבֵּד יָמִים לְמַעַן יְהוָֹה אֵינֶנוּ מְכַבְדָם הָאֹכֵל אֹכֵל לְשֵׁם יְהוָֹה כִּי-יוֹדֶה לוֹ וַאֲשֶׁר אֵינֶנּוּ אֹכֵל לְשֵׁם אֱלֹהִים וִיהוֹדֶנּוּ׃ ז כִּי אֵין-אִישׁ מֵאִתָּנוּ יִחְיֶה לְנַפְשׁוֹ וְאֵין-אִישׁ יָמוּת לְנַפְשׁוֹ׃ ח כִּי אִם-נִחְיֶה נִחְיֶה לַיהוָֹה וְכִי-נָמוּת נָמוּת לַיהוָֹה לָכֵן כִּי-נִחְיֶה וְכִי-נָמוּת לַיהוָֹה הִנֵּנוּ׃ ט כִּי הֲלֹא בַּעֲבוּר זֹאת מֵת הַמָּשִׁיחַ וַיָּקָם וָחָי לְהִשְׂתָּרֵר כְּאָדוֹן עַל-הַמֵּתִים וְעַל-הַחַיִּים׃ י וְאַתָּה לָמָּה-זֶּה תִשְׁפֹּט אֶת-אָחִיךָ אוֹ מַדּוּעַ תָּבוּז אַתָּה לְאָחִיךָ וְכֻלָּנוּ לַמִשְׁפָּט נַעֲמֹד לִפְנֵי כִסֵּא דִּין אֱלֹהִים׃(משלי יד' כא') יא כִּי כָתוּב חַי-אָנִי נְאֻם יְהוָֹה (ישעיהו מט' יח') כִּי לִי תִּכְרַע כָּל-בֶּרֶךְ וְכָל-לָשׁוֹן תּוֹדֶה לֵאלֹהִים׃(ישעיהו מה' כג') יב עַל-כֵּן כָּל-אִישׁ וְאִישׁ לְנַפְשׁוֹ יָשִׁיב אֶת-אֱלֹהִים דָּבָר׃ יג וְעַתָּה לֹא נִשְׁפֹּט עוֹד אִישׁ אֶת-אָחִיו כִּי אִם-נַחֲרֹץ מִשְׁפָּט לְבִלְתִּי תֵת אִישׁ לִפְנֵי אָחִיו מוֹקֵשׁ אוֹ מִכְשׁוֹל׃ יד יָדַעְתִּי גַּם-יָדַעְתִּי בְּיֵשׁוּעַ אֲדֹנֵינוּ כִּי-אֵין דָּבָר טָמֵא מֵאֵלָיו וְרַק-טָמֵא הוּא לְמִי אֲשֶׁר יַחְשְׁבֶנּוּ לְטָמֵא׃ טו וְאִם-יֵעָצֵב אָחִיךָ בְּמַאֲכָלְךָ אֵינְךָ הֹלֵךְ עוֹד בְּאֹרַח אַהֲבָה אַל-תַּשְׁחֵת בְּמַאֲכָלְךָ אֶת-אָחִיךָ אֲשֶׁר הַמָּשִׁיחַ מֵת בַּעֲדוֹ׃ טז וְאַל-תִּתֵּן יִשְׁרַת נַפְשְׁךָ לְגִדּוּפִים׃ יז כִּי-מַלְכוּת אֱלֹהִים אֵינֶנָּה מַאֲכָל וּמִשְׁתֶּה כִּי אִם-צְדָקָה שָׁלוֹם וְחֶדְוָה בְּרוּחַ הַקֹּדֶשׁ׃ יח וְהָעֹבֵד אֶת-הַמָּשִׁיחַ בָּאֵלֶּה רָצוּי הוּא לֵאלֹהִים וְנֶחְמָד בְּעֵינֵי אֲנָשִׁים׃ יט עַל-כֵּן נִרְדְּפָה-נָּא דַרְכֵי שָׁלוֹם לְכוֹנֵן אִישׁ אֶת-רֵעֵהוּ׃(תהילים לד' טו') כ אַל-תַּהֲרֹס פֹּעַל אֱלֹהִים עַל-דִּבְרַת מַאֲכָל כָּל-דָּבָר הוּא טָהוֹר וְרַק רַע הוּא לַאֲשֶׁר יֹאכְלֶנּוּ לְהִתְנַקֵּם בְּנַפְשׁוֹ׃ כא טוֹב לֹא-לֶאֱכֹל בָּשָׂר לֹא-לִשְׁתּוֹת יָיִן וְלֹא-לַעֲשׂוֹת דָּבָר אֲשֶׁר יִהְיֶה מִכְשׁוֹל לֵב לְאָחִיךָ אוֹ אֲשֶׁר יִוָּקֶשׁ-בּוֹ אוֹ יָדָיו תִּרְפֶּינָה׃ כב יֶשׁ-לְךָ אֱמוּנָה תְּהִי-לְךָ לְבַדְּךָ לִפְנֵי הָאֱלֹהִים אַשְׁרֵי הָאִישׁ אֲשֶׁר לִבּוֹ לֹא יַרְשִׁיעֶנּוּ בַּאֲשֶׁר יִבְחַר-לוֹ׃ כג אַךְ אִם-יֹאכַל וְלִבּוֹ נִפְלַג עָלָיו וְנָשָׂא עֲוֹנוֹ יַעַן כִּי לֹא בֶאֱמוּנָה מַעֲשֵׂהוּ וְכֹל אֲשֶׁר נַעֲשָׂה בִּבְלִי אֱמוּנָה חֵטְא הוּא׃